Vil du bruke litt av di tid til å gi nyinnflytta flyktningar ein betre start i Volda? Vil du vere med på å orientere 
flyktningane om det norske samfunnet? Kan du noko om utdanning, yrkeslivet og lokale fritidsaktivitetar? 
Er du interessert i å lære meir om deira bakgrunn og kultur? Vil du bidra til haldningsendringar i det norske 
samfunnet?

Ved utgangen av mars 2004 hadde 21 flyktningar i Volda flyktningguide. Flyktningguide er eit samarbeidstiltak 
mellom Volda Røde Kors, frivilligsentralen og innvandrarkontoret, og har som formål å skape kontakt mellom 
nyinnflytta flyktningar og lokalbefolkninga i Volda. Gjennom ei slik kontakt kan flyktningane byggje verdfulle 
sosiale nettverk.

Som nyinnflytta til Volda kan det vere vanskeleg å kome i kontakt med lokalbefolkninga. Som frivillig flyktningguide  
kan du gjere noko med den manglande kontakten mellom nye og meir etablerte innbyggjarar. Di oppgåve som guide 
er å fungere som eit bindeledd til lokalmiljøet. Flyktning og guide vert kopla saman med bakgrunn i at dei har noko til 
felles: Fritidsinteresser, yrke, utdanning, familiesituasjon m.m.

Flyktningane har nyleg fått innvilga opphaldsløyve i Noreg, og fått Volda som busetjingskommune. No har dei behov 
for orientering om lokale forhold, for sjølve å kunne ta seg fram steg for steg. Di oppgåve er å orientere, der han/ho 
har behov for det.

Di orientering vil bevisstgjere den einskilde om mogelegheiter, rettar og plikter i Noreg. Slik kunnskap vil gi auka 
mogelegheiter for at flyktningane kan bidra med sine ressursar på lik line med resten av lokalbefolkninga.

I fellesskap kan de byggje sosiale nettverk. Å ha eit nettverk er viktig i arbeidet med å lære eit nytt språk, skaffe 
seg jobb og utdanning. Kva kan dokke gjere saman? Eit kafèbesøk, gå på kino, ta ein spasertur eller ta del i andre 
fritidsaktivitetar? Kanskje snakke om arbeidslivet, jobbsøking og utdanning i Noreg?

Saman kan vi fremje integrering og leggje til rette for at flyktningane kan trivast. Vegen inn i det norske samfunnet 
går gjennom kontakt med menneske som bur her. Flyktningar vil lære mykje om oss, og du vil lære mykje om den 
einskilde sin bakgrunn og kultur.

Kontakt:

Frivilligsentralen i Volda, tlf. 70078838, e-post: frisentvolda@c2i.net

Innvandrarkontoret, tlf. 70058711, e-post: nina.kvalen@volda.kommune.no 
eller  tlf. 70058738, e-post: heidi.wiik@volda.kommune.no   eller   astrid.berild@volda.kommune.no

Koplingar/lenker: