Kunngjering frå Volda kommune

Publisert av: Per Heltne
Dato:             2.2.07

EIGENGODKJENNING AV REGULERINGSPLAN NY STAMVEG E39 PÅ STREKNINGA GEITVIKA - SOGN OG FJORDANE GRENSE (KVIVSVEGEN)

I samsvar med plan- og bygningslova (PBL) § 27-2 nr. 3, vert det gjort kjent at Volda kommunestyre har eigengodkjent reguleringsplan for ny stamveg E-39 på strekninga frå Sogn og Fjordane grense til Geitvika i Austefjorden. Planen vart vedteken i kommunestyremøte den 18.01.2007, K-sak nr. 010/07.

Innafor planområdet er det planlagt stamvegtrasé frå Sogn og Fjordane grense til Geitvika i Austefjorden. I tillegg inngår nye tilknytingar til rv.651ved Geitvika og til fv. 047 ved Kalvatn, Gjersdal og Fyrde, samt område for massedeponi, jordbruksvegar, avkøyrsler, busslommar, m.m.

Dokumenta i saka er lagt ut offentleg ettersyn ved servicekontoret og folkebiblioteket i rådhuset. Planen er og tilgjengeleg på kommunen si heimeside, www.volda.kommune.no

Høyringsinstansar og registrerte partar vert orienterte ved eige brev.

Vedteken reguleringsplan er bindande innanfor planområda for alle arbeid og tiltak som er nemnde i §§ 81, 84, 86a, 86b og 93 i plan- og bygningslova. Det same gjeld frådeling og anna bruk av areal og bygningar som kan vanskeleggjere gjennomføring av plan.

Krav om erstatning etter § 32, nr. 1, eller krav om innløysing etter § 42 i plan- og bygningslova må vere sett fram seinast tre -3- år etter denne kunngjeringa. Krav om erstatning og innløysing skal ein rette til Kommunen.

Ein kan i medhald av PBL §§ 15 og 27-3, jfr. forvaltningslova kap.VI, klage på vedtak om eigengodkjenning av plan til Fylkesmannen i Møre og Romsdal.

Klage, som må vere skriftleg, skal merkast med arkivnr. 2007/27 og sendast til Volda kommune, Samordnings og utviklingsstaben, Stormyra 2, 6100 Volda, innan 01.03.2007.

Administrasjonssjefen

Raud linje viser trase` for Kvivsvegen mellom Grodås og Austefjorden